ՀԱՄԱՅՆՔԻ ՂԵԿԱՎԱՐԻ ՄՈՏ ՔԱՂԱՔԱՑԻՆԵՐԻ ԸՆԴՈՒՆԵԼՈՒԹՅԱՆ ԿԱՐԳ

1. ԸՆԴՀԱՆՈՒՐ ԴՐՈՒՅԹՆԵՐ

Սույն կարգով կարգավորվում են Ակունքի համայնքի ղեկավարի մոտ քաղաքացիների ընդունելության կազմակերպման հետ կապված հարաբերությունները`ՀՀ օրենսդրությամբ սահմանված կարգով: Համայնքի ղեկավարի մոտ քաղաքացիների ընդունելությանը մասնակցելու, համայնքին առնչվող հարցերի վերաբերյալ ՀՀ օրենսդրությամբ սահմանված կարգով դիմելու իրավունք ունի յուրաքանչյուր ոք: Համայնքի ղեկավարի մոտ ընդունելությունը կանոնակարգում և ղեկավարում է համայնքի ղեկավարը, իսկ նրա բացակայության ժամանակ տեղակալը կամ քարտուղարը:

Համայնքում քաղաքացիների ընդունելությունն իրականացվում է համաձայն սահմանված ժամանակացույցի` յուրաքանչյուր շաբաթվա 1 օրը քաղաքացիների ընդունելությունն իրականացնում է համայնքի ղեկավարի տեղակալը, կամ քարտուղարը:

Ընդունելության ժամանակացույցը փակցվում է համայնքի ղեկավարի նստավայրի հայտարարությունների ցուցանակի վրա, տեսանելի տեղում: Իրազեկումը կարող է կատարվել նաև տեղեկատվական այլ միջոցներով /վեբ կայք, ԶԼՄ-ներ/:

ՔԱՂԱՔԱՑԻՆԵՐԻ ԳՐԱՆՑՄԱՆ ԿԱՐԳԸ, ԸՆԴՈՒՆԵԼՈՒԹՅՈՒՆԸ ԵՎ ԱՐԴՅՈՒՆՔՆԵՐԻ ԱՄՓՈՓՈՒՄԸ

Ընդունելությանը կարող են մասնակցել ինչպես նախօրոք համայնքի ղեկավարի ընդունելությունների մատյանում գրանցված, այնպես էլ գրանցվել չհասած, բայց շտապ լուծում պահանջող հարցեր ունեցող քաղաքացիները:

Համայնքի պաշտոնական ինտերնետային կայքի առկայության դեպքում քաղաքացին կարող է գրանցվել նաև ինտերնետով:

Ընդունելությունների մատյանում գրանցումն իրականացնում է աշխատակազմի համապատասխան աշխատողը: Հանձնարարականների կատարման ընթացքին հետևում և արդյունքներն ամփոփում է աշխատակազմի քարտուղարը:

Ընդունելությունների մատյանում գրանցվում են քաղաքացու անունը, ազգանունը, հասցեն, հեռախոսահամարը, ընդունելության օրը և ժամը, որից հետո նրան տրվում թէ թերթիկ իր անուն-ազգանվամբ, հերթական համարով և ներկայացվող հարցերի նշումով:

Գրանցումը կարող է մերժվել. Եթե նույն հարցով քաղաքացուն արդեն տրվել է սպառիչ պատասխան, կամ եթե նրա հարցը դուրս է համայնքի ղեկավարի կամ ավագանու լիազորությունների շրջանակից:

Համայնքի ղեկավարի ընդունելություններին մասնակցում են նաև տեղակալը, քարտուղարը և կառուցվածքային ստորաբաժանումները ղեկավարող աշխատողները:

Ընդունելության ժամանակ բարձրացված հարցերը կարող են լինել գրավոր կամ բանավոր, որոնց կարող են տրվել բանավոր պատասխաններ ու պարզաբանումներ, իսկ անհրաժեշտության դեպքում գրավոր պատասխաններ`օրենքով սահմանված ժամկետներում: Եթե քաղաքացին բարձրացնում է նախօրոք չգրանցված հարցեր առանց գրավոր հիմքի, որոնք պահանջում են լրացուցիչ ուսումնասիրություն, ապա նրան առաջարկվում է խնդիրը ներկայացնել գրավոր, որի պատասխանն ուղարկվում է 1 ամսվա ընթացքում: Լրացուցիչ ուսումնասիրություն չպահանջող դիմումներին պատասխանվում է 15 օրվա ընթացքում:

Ընդունելության ավարտից հետո կատարվում է բարձրացված հարցերի և տրված հանձնարարականների վերլուծություն:

Ընդունելությունների վերաբերյալ մինչև հաջորդ ամսվա 1-ին տասնօրյակը տեղեկատվություն է ներկայացվում մարզպետարան`ըստ վերջինիս կողմից սահմանված ձևի:

Քաղաքացիների ընդունելությունների իրերի և ժամերի մասին հայտարարությունները կարող են տեղադրվել նաև համայնքի պաշտոնական ինտերնետային կայքում: Գործընթացը պարբերաբար լուսաբանվում է, ներկայացվում են ընդունելություններին մասնակցող  քաղաքացիների կողմից բարձրացված հարցերի ուղղություններն ու վերջիններիս լուծման ուղղությամբ ձեռնարկվող միջոցառումները: